Dags: 27. mars 2002
Höfundur: Már Örlygsson (mar@anomy.net) viðmótshönnuður og ráðgjafi
Bandaríska netgreiðslufyrirtækið Paypal býður í dag þjónustu þannig að Íslendingar geta skráð sig og framkvæmt greiðslur innan Paypal kerfisins. Þetta gefur Íslendingum kost á takmarkaðri þáttöku (sem neytendur) í hinu alþjóðlega Paypal-viðskiptaneti.
Sá galli er á gjöf Njarðar að Paypal leyfir ekki Íslendingum að leysa út innistæður sínar, því enn sem komið er senda þeir ekki ávísanir í ábyrgðarpósti út fyrir Bandaríkin. Það gæti hins vegar auðveldlega breyst, og þá standa einföld, netvædd smáviðskipti landsmönnum til boða fyrir tilstilli erlends stórfyrirtækis.
Það er því ljóst að Íslensku bankarnir geta ekki setið aðgerðalausir endalaust, því landamæraleysi netsins gerir erlendum fjármálafyrirtækjum kleyft að metta íslenska netmarkaðinn með þjónustu sinni á einni nóttu, og þannig bókstaflega stela senunni undan Íslensku bönkunum á þeirra eigin heimavelli.
Einfaldar netgreiðslur augljóslega ein möguleg leið fyrir Íslensku bankana til að mæta þörf íslenska markaðarins fyrir einfalt og viðráðanlegt netgreiðslufyrirkomulag. Leið sem er bæði fljótfarinn og raunhæf, því hún nýtir hinn geysistóra hóp velþjálfaðra heimabankanotenda sem bankarnir hafa komið sér upp á seinustu árum.
Með útfærslu Einfaldra netgreiðslna sem byggjast á núverandi heimabönkum væru íslensku bankarnir búnir að kaupa sér ákveðinn gálgafrest á meðan þeir leita leiða til að útvíkka Einfalda netgreiðslukerfið á alþjóðlega markaði. Þannig geta íslensku bankastofnarnir e.t.v. komið sér í þá stöðu að verða áhugaverðir samstarfsaðilar fyrir erlenda netgreiðslurisa á borð við Paypal.
©2002 Már Örlygsson (mar@anomy.net)